वर्ल्ड कप 2019 : बर्मिंगहॅम : विजय शंकरच्याऐवजी संघात कोणाला घ्यायचे या प्रश्नावर भारताचा कर्णधार विराट कोहली आणि मार्गदर्शक यांनीच लगेच मयांक अगरवालचे नाव सुचविले होते. 

विश्‍वकरंडक क्रिकेट स्पर्धेत भारताचा विजय शंकर जखमी झाला तेव्हा बदली खेळाडू कोण, हा प्रश्‍न उभा होता. निवड समिती अर्थातच राखीव खेळाडूंमधील अंबाती रायुडू याचा विचार करीत होती. निवड समिती अध्यक्ष एम. एस. के. प्रसाद सध्या इंग्लंडमध्येच आहेत. मात्र, कर्णधार विराट कोहली आणि रवी शास्त्री यांनी निवड समितीसमोर थेट मयांक अगरवालचे नाव ठेवले. दोघेही मयांकच्या निवडीसाठी आग्रही होते. त्यामुळे निवड समितीला चर्चा करण्याचाही वेळ मिळाला नाही. 

स्पर्धेदरम्यान सर्वप्रथम शिखर धवन जखमी झाला तेव्हा निवड समितीने राखीव खेळाडूंमधील रिषभ पंतची निवड केली होती. दुसऱ्या वेळी मात्र तसे घडले नाही.